ZORAM TODAY| Aizawl 15th May, 2024: Tun hnai hian Aizawl District huam chhungah vawk hri African Swine Fever (ASF) leng a hluar thar hle mai a. Veng thenkhat chu ASF hrilenna (Infected Area) ah puan an ni tawh a ni. He hri laka Aizawl District mipuite an lo him a, an fimkhur nan leh hri leng zel tur ven nan vawk chungchangah inkhuahkhirhna Aizawl DC, Nazuk Kumar chuan vawiin khan a ti chhuak.

 Deputy Commissioner, Aizawl District chuan CrPC 1973 Section 144 in thuneihna a pek angin, Aizawl District huam chhunga mipuite zawm turin a hnuaia mi ang hian thupek a chhuah :-

1) Aizawl District chhungah ram dang (foreign) atanga vawk, vawksa leh vawksa atanga siam eitur chi reng reng lak luh khap tlat a ni.

2) State dang leh district dang atangin vawk, vawksa leh vawksa atanga siam eitur reng reng lakluh khap tlat a ni.

3) Vawk damlo reng reng talh leh hralh khap tlat a ni. Vawk damlo chu dah hran vat tur a ni. Vawk thi reng reng thuk taka phum bo tur a ni.

4) Vawk damlo leh thi an awmin AH & Very Department Official-te hnenah hriattir vat tur a ni.

5) Aizawl District chhung khua leh khua emaw, veng leh veng emaw-a vawk inlakpawh tawn tur reng reng in vawk hrisel tha chauh lak tur a ni. 'Infected Area'-a puante atangin vawk lak luh leh lak chhuah khap tlat a ni.

He thupek hian Dt. 25.4.2024-a inkhuahkhirhna thupek chhuah tawh chu a luahlan ang.

He thupek hi tih danglam a nih loh chuan thla hnih (2 months) chhung a huam anga, zawm lo te chu IPC Section 188 dan hmanga hrem an ni ang.